Crystal Palace vann öruggan 5:1 stórsigur gegn West Bromwich Albion í ensku úrvalsdeildinni í knattspyrnu í dag. WBA lék einum færri í tæpan klukkutíma og áttu því afar erfitt uppdráttar í leiknum.
Wilfried Zaha sneri aftur í lið Crystal Palace eftir að hafa misst af síðustu tveimur leikjum vegna kórónuveirusmits og hafði endurkoma hans afar jákvæð áhrif á liðið.
Strax á 8. mínútu leiksins hóf hann að láta að sér kveða. Zaha komst þá í góða stöðu utarlega í teignum og gaf fastan bolta fyrir markið sem endaði með því að Darnell Furlong, varnarmaður WBA, varð fyrir því óláni að skora sjálfsmark, 1:0
Á 30. mínútu jafnaði WBA metin. Furlong var áfjáður í að bæta upp fyrir mistökin og komst upp að endamörkum og reyndi fyrirgjöf. Hún fór í varnarmann en Furlong fékk boltann aftur og lagði hann út í teiginn á Conor Gallagher sem jafnaði með hnitmiðuðu skoti, 1:1.
Á 34. mínútu átti sér svo stað afdrifaríkt atvik. Þá braut Patrick van Aanholt í liði Palace á Matheus Pereira hjá WBA, sem brást ókvæða við og sparkaði í van Aanholt á mjög viðkvæman stað. Eftir að dómarinn skoðaði atvikið í VAR-sjánni ákvað hann að reka Pereira út af.
1:1 var staðan í hálfleik en Palace mættu grimmir til leiks í síðari hálfleiknum. Zaha kom liðinu aftur í forystu á 55. mínútu með frábæru skoti, 2:1.
Fjórum mínútum síðar komst Christan Benteke á blað þegar van Aanholt gaf boltann út í teig og náði Benteke að skalla boltann milli fóta Kyle Bartley í vörn WBA og í netið. Staðan orðin 3:1.
Á 68. mínútu skoraði Zaha svo annað mark sitt þegar boltinn hrökk til hans í teignum eftir frábæran sprett Eberechi Eze, 4:1
Christian Benteke batt svo endahnútinn á leikinn með öðru marki sínu þegar hann fékk sendingu frá Nathaniel Clyne í teignum, sneri á Semi Ajayi og skoraði með laglegu skoti.
5:1 lokatölur þar sem Palace naut þess til hins ítrasta að fá Zaha til baka. Leikirnir tveir sem hann missti af töpuðust enda báðir og náði liðið ekki að skora eitt einasta mark.
Mbl.is